Valle

Valle kommune har ca 1100 innbyggarar fordelt på 1265 kvm². Kommunen grenser til Bykle og Tokke i nord, Fyresdal i aust, Bygland i sør og Sirdal i vest. Busetnaden er spreidd langs Otra og ein har store, flotte heier på aust- og vestsida av dalen. Naturen er viktig for valldølen og hylstringen som brukar heiane både sommar og vinter.  Hovudferdselsåra gjennom kommunen er RV 9 som strekk seg frå Kristiansand til Hovden. Lengda på Valle kommune etter RV 9 er 40 km. 

Vasskrafta har spelt ei viktig rolle i utviklinga av kommunen. Med Otravassdraget og dei tilhøyrande kraftverk er Valle ein vasskraftkommune. Brokke kraftverk ligg på Nomeland på Rysstad og har ei middelproduksjon på 1970 GWh. Sira-Kvina vassdraget mot vest og Finndølavassdraget i aust er også knytta til kommunen. På heiene i aust og vest er det innsjøar, nokre av dei oppdemd til kraftproduksjon og nokre renn ned i dalen som elver og bekkar. På Setesdal vesthei finn vi Roskreppfjorden, magasin for Roskrepp kraftverk, ein del av Sira Kvina-utbygginga. På Setesdal austhei ligg mellom anna magasinet Hovvatn som har sitt utløp i Fyresdal og er ein del av Finndøla i Arendalsvassdraget. Gloppefossen som er 116 meter høg er ein del av Veiåni som renn frå Torvikvatn i Setesdal austhei.  Fossen er eit kjent turmål i kommunen. I utbygginga av Brokke nord (Bykle) blei Gloppefossen skjerma og ein har fortsatt brusande vatn i fossen som renn ut i Otravassdraget.

Rettane frå vasskrafta gjev viktige inntekter til kommunen gjennom ordningar som eigedomsskatt, konsesjonskraft og konsesjonsavgifter. 

Valle kommune er ein av dei fem kommunane i Agder som har eit høgare konsesjonskraftvolum enn dei har forbruk i kommunen. Det betyr at fylkeskommunen forvaltar den overskytande krafta og Valle bidreg då til ei verdiauke i heile Agder-regionen. 

Valle kommune er medlem av Setesdal Regionråd.